Raysal-wasaare Abiy Oo Ka Hadlay In La Gaadhay Ujeedada Ciidamadoodu U Galeen Soomaaliya Iyo Suudaan.
Addis Ababa(Halsan):-Raysal wasaaraha dalka Itoobiya Dr. Abiy Ahmed ayaa ka hadlay hawl galo ay fuliyeen ciidamada difaaca ee dalkaasi iyo natiijooyinka ay ka gaadheen.
Raysal wasaare Abiy Ahmed oo ka hadlayey munaasibad lagu qabtay gobolka Oromia oo lagu soo xidhayey dabaal degyo ay samaynayeen ciidamada Itoobiya ayaa ka waramay hawlo galo ay wadamada jaarka ka fuliyeen ciidamadu.
Raysal wasaaraha Itoobiya Dr. Abiy Ahmed oo ka hadlaya guulo uu sheegay inay ciidamadu difaacu gaadheen ayaa waxa uu yidhi “Ciidamada difaacu waxay guul ka gaadhaan caqabadihii ka horyimid ee dhibta ku ahaa qaranimada Itoobiya ee wakhtiyadii hore ina soo maray waxaanay inaga mudan yihiin xushmayn.”ayuu
yidhi raysal wasaaraha Itoobiya.
Sidoo kale raysal wasaare Dr. Abiy Ahmed ayaa intaas raaciyey “Ciidamadu waxay buuxiyeen dhamaan qorshaheenii difaaca oo ay ku jiraan hawl galada nabad ilaalinta ee wadamada aynu jaarka nahay ee soomaaliya iyo suudaan.”
Sidoo kale raysal wasaaraha Itoobiya ayaa ka hadlay isbadalada lagu wado ciidamada difaaca ee dalka Itoobiya gaar ahaan dhinacyada maamul wanaaga iyo qabyada kale ee jirta isaga oo xusay in ilaa hada la gaadhay natiijooyin cajiib ah, waxaanu tilmaamay in casriyeynta ciidamadu aanay ahayn hawl markaliya dhacaysa balse ay u baahan tahay wakhti.